Кошаркарите на Лиеткавбелис го направија најголемото изненадување во вториот круг од натпреварите во Еврокупот. Литванскиот состав потполно неочекувано, во Загреб ја совлада Цедевита со 80:76, и сериозно се приближија кон пласманот во следниот круг од натпреварите. И иако е рано да се носат заклучоци, сепак, овој втор успех на тимот од Паневежис, и тоа на гостински терен, дава такви сигнали.
А ја прави многу потешка ситуацијата за нашиот првак. МЗТ Скопје во ова коло беше слободен, а Гран Канарија на „нашите“ Мек Кејлеб и Хендрикс, со убедливиот триумф против Нижњи Новгород (106:80), на гостувањето во Русија, потврди дека е топ фаворит во оваа „А“ група.
Впрочем, слаб старт направија и другите АБА лигаши во овие две кола на Еврокупот.
Еден од актуелните ко-лидери во лигата на Јадранот, подгоричка Будуќност беше „прегазен“ од Уникаха со 62:86. А пораз запишаа и кошаркарите на У. Олимпија на гостувањето кај германскиот Улм (82:87).
Не помина добро ниту рускиот Химки. Тимот каде во улога на прв асистент е нашиот стручњак Тане Спасев, загуби на гостувањето во Фуенлабрада со 85:89, па сега е на половичен ефект (1-1) во групата „Б“.
Интересно е дека по овие уводни две кола, само три екипи се со максимален ефект „два од два“. Покрај Гран Канарија, во тој круг влегуваат уште и Лиеткабелис, и берлинска Алба, која „извади“ важна победа во Билбао (85:77).