„Игравме доста добро во првите три четвртини, но во последната бевме доста заморени, особено ако се знае дека ги немавме на располагање Николовски и Пајиќ, кои се повредени. Нашите центри Шарабидзе и Ѓекиќ одиграа повеќе минути токму поради отсуството на повредените. На крајот имавме и малку среќа, но мислам дека ја заслуживме и среќни сме поради победата“
Вака некако коментираше тренерот на Фени Индустри, Љупчо Малинков, по уште еден балкански успех на кавадарчани. Оној против екипата на Пеќ од (90:88), петти за Фени Индустри по осум одиграни кола, кој ги става на делба на првото место во групата „Б“ заедно со бугарскиот Берое.
И што е исто така важно, речисизи сигурен пласман во следната ТОП 8 фаза на БИБЛ лигата.
Натпреварување во кое и Ѓорѓи Шарабидзе полека си го пронајде своето место. Грузиецот беше најдобриот поединец на „бело-црните“ во овие последни 40 минути од 2016 година.
За 38 минути кои остана на теренот во ладниот „Јасмин“, запиша ефект од 24 поени (11/16 за два и 2/2 за еден поен), но и 13 скока и 6 асистенции за високи 39 индексни поени.
„Навистина сум среќен што успеавме да го победиме овој натпревар. И гостите од Пеќ играа добро, но ние сме доста јаки, особено кога играме на домашен терен. Се гордеам со моите соиграчи, кои ми помогнаа да дадам сè од себе“- истакна силното крило на кавадарчани за кои и нема да има многу слободни денови за новогодишните празници, ако се знае дека за 18 јануари е предвиден мечот со Сутјеска, кој ќе се игра во нивниот „Јасмин“.