Крилото на Њујорк никс, Кармело Ентони, дополнително е повикан за настап на неделниот ол-стар натпревар, и тоа на местото на повредениот Кевин Лав. Така Ентони непланирано ќе биде во тимот на Истокот, но правилата се дека кога некој ќе се повреди и не може да игра како во случајов со играчот на Кливленд кавалирс, неговата замена ја бира комесарот. Адам Силвер реши Ентони да се појави во Њу Орлеанс.
Ентони беше помирен со судбината дека првпат по седум години нема да биде ол-стар, не бил лут поради тоа, и веќе имал направено други планови за викендов.
„Добро ќе ми дојде паузата за да го одморам телото и да ми се избистри умот од разни мисли, сакам да побегнам од секојдневието. Ако ми се јават да одам таму, ќе размислам дали да прифатам, но навистина сакам да ја искористам паузата“ - изјави Ентони пред само неколку дена.
Имаше најава дека на местото на Лав ќе биде повикан центарот на Филаделфија, Џоел Ембилд, но тој има проблеми со коленото, и нема да игра ниту на натпреварот „Ѕвезди во подем“, па комесарот одлучи да го повика ветеранот Ентони, кој во 2017 година има просек од 25 поени, 6,1 скока и три асистенции по натпревар. Можеби комесарот се водеше и според бројот на гласови. Кармело беше играчот на Истокот кој „извиси“ од тимот со најголем број гласови од фановите.
Како и да е, Ентони по десетти пат во кариерата ќе биде ол-стар. Сега најдобри играчи (според статистиката) од Истокот кои нема да играат на егзибицискиот атрактивен настан се Бредли Бил, Двајт Хауард, Ал Хорфорд, Кристапс Порзингис и Хасан Вајтсајд.