Иако Лејкерси беа тие кои водеа во најголем дел од средбата во „Стејплс центарот“, Кавалирс одиграа доволно добро да спречат изненадување. од средината на вториот период па сè до почетокот на последниот, домашниот тим имаше предност од 11 поени.
За среќа, во Кавалирс имаат некои од најдоминатните играчи во НБА, па беше јасно дека ништо не е готово додека времето не истекне.
Уште еднаш ги предводеше Кајри Ирвинг со 46 поени, но голема помош доби од Леброн Џејмс, кој застана на 34. Свои минути имаше и третиот Ол-стар играч Кевин Лов кои ги заокружи со дабл-дабл од 21 поен и 15 скока. Кај „езерџиите“ блескаше Деанџело Расел со 40 поени и 6 скока, Кларксон реализираше 19, а Брендон Инграм еден помалку.
„Коњаниците“ остануваат на првото место на Истокот со скор 46-23, и се многу блиску да ја потврдат „единицата“. Со 20-50, Лејкерси се на претпоследното место на Западот.
Портланд победи во Мајами со многу подобра игра во второто полувреме. Демиен Лилард експлодираше со 49 поени (и пет асистенции), но имаше одлични соработници во Босанецот Јусуф Нуркиќ, кој оствари дабл-дабл од 21 поен и 12 скока и Си Џеј Меккалум со 18 поени и по пет скока и асистенции. Кај „жешките“, по 17 поени дадоа Драгиќ и Вајтсајд.
Кошаркарите на Њу Орлеанс дадоа 75 поени во второто полувреме со кои ја прегазија Минесота. Пеликанс ги предводеше Ентони Дејвис со 28 поени и 12 скока Џордан Крафорд додаде уште 22 поени, а Џру Холидеј еден помалку заедно со седум асистенции.
На другата страна, Карл Ентони Таунс уфрли 33 поени, имаше и шест скока, додека Ендрју Вигинс застана на бројот 25.
Убедливо, по нешто подолга пауза, делуваа и кошаркарите на Торонто, кои без проблеми ја минаа Индијана Пејсерс (116:91). Иако гостите имаа подобар старт, и кратко време имаа и водство, сè беше поинаку во вториот дел од играта во кој Репторс стигнаа и до плус од 27 поени, кој го задржаа до самиот крај.
Сан Антонио ја прекина мини серијата од два порази по ред, со успех над Сакраменто. Во втората и третата четвртина Спарс направија разлика од дури 31 поен. Домашните имаа седум кошаркари со двоцифрен ефект.
СЛИКА. КАЈРИ ИРВИНГ - СО ЛЕЈКЕРСИ
Ги потопи „езерџиите“ - Кајри Ирвинг
РЕЗУЛТАТИ
Бруклин - Далас 104:111
Филаделфија - Бостон 105:99
Детроит - Феникс 112:95
Торонто - Индијана 116:91
Њу Орлеанс - Минесота 123:109
ЛА Лејкерс- Кливленд 120:125
Мајами - Портланд 104:115
Сан Антонио - Сакраменто 118:102