Доколку екипата на Стал Остров Вјелкополски на свој терен го совлада и Асеко Гдиња на 1 април, клубот чиј тренер е Емил Рајковиќ, ќе постави нов клупски рекорд по број на победи во низа.
Македонскиот стручњак со својот полски клуб има серија од дури 10 победи едноподруго, и засега е третопласиран на табелата. А, Рајковиќ есеноска откако си даде оставка од позицијата тренер на МЗТ Скопје, кога го презеде полскиот тим, имаа скор од 0-3 и беа последни на табелата. Решија наместо Зоран Сретеновиќ да го ангажираат Рајковиќ, кој имаше искуство од работа во Полска и од претходно, кога седеше на клупата на Шласк Вроцлав. Рајковиќ во стручниот штаб го донесе и асистентот Марко Величковиќ со кого соработуваа пред неколку сезони во Работнички.
Низата почна дома на 25 јануари против Торун. Потоа славеа дома и против Роса Радом, па на гости кај Трефл Сопот. Овие три победи како да беа „катапулт“ кој ги исфрли напред, тимот се здоби со самодоверба, и продолжи да меле сè пред себе. Серијата продолжи против Сиарка, па со Полфарма, Шчечин, Даброва Горница, Кросно, Полфармекс, а јубилејната десетта победа се случи викендов на гостувањето кај Кошалин.
Ова е само вторпат во клупската историја, Стал да добие десет меча по ред. Првпат тоа се случи во сезоната 1999/2000, кога на клупата седеше тренерот Анжеј Ковалчик.
Бројките кажуваат многу за тоа во каква форма игра Стал во последните два месеци. Имаат вкупно 10 победи по ред, четири победи по ред на гостински терен, во 2017 година имаат 11 победи на 12 меча, 16 триумфи на последните 18 средби, а дојдоа до бројка и од 18 победи сезонава. Сепак, и покрај сите овие убави серии, во клубот се гладни за победи и најавуваат оти немаат намера да завршат со победување.
Пред Стал Остров се само Стелмет Зиелона гора и Анвил Влоцлавек, екипи против кои тимот на Рајковиќ загуби, но тоа беше кон крајот на минатата и почетокот на оваа година. Со Анвил кој е втор, треба да играат дома на 9 април, а две недели подоцна ќе го нагостат лидерот Стелмет, тест кој ќе биде показател дали имаат шанса за нешто повеќе во плејофот.