Бостон Селтикс имаше мало „интермецо“ во кое можеше да ужива како лидер на Истокот. Но, само до моментот кога кај нив не дојде актуелниот владетел на лигата - Кливленд.
Кавалирс ги разбија Селтикс, во секој поим на кошаркарската игра. Славеше во „ТД Гарден“ со 114:91.
И не можеше да биде поинаку кога Леброн е во свој МВП елемент. Имаше 36 поени (14/22 од игра), и уште по 10 скока, 6 асистенции и две блокади. Незапирливо за Бостон.
По „мирната“ прва четвртина која заврши со минимални 20:19. Но, во наредните два уследи вистинско „чистење“ во кои Кливленд даде дури 71, а на ривалот му дозволија „само“ 46 коша. За плус од 24 поени, недостижни за босотн, барем за овој меч.
„Келтите“ ќе имаат шанси да се „поправат“ во последните четири натпревари од регуларниот дел. Сепак, се само на една победа за Кавс, мо ќе им требаат и порази, односно нова црна серија на Кливленд, како онаа од пред две недели, во што е тешко да се поверува.
Тешко е да се поверува и тоа дека Расел Вестбрук ќе даде многу поени, а нема да запише нов трипл-дабл.
Да, Оклахома го порази Мемфис (103:100), а Расел имаше импресивни бројки - 45 поени (8/13 за три поени, рекорд на кариерата), 10 асистенции и 9 скока. Од нив дури 29 постигна во второто полувреме. Ја погоди и клучната тројка за победа на 14 секунди до крајот, по која Тандер им побегна на Гризлис на цели четири победи со кои го потврди местото број 6.