Перо Антиќ би можел да стане добитник на признанието за заслужен граѓанин на Општина Центар, за особени достигнувања во областа на спортот, ако Советот на Општината го прифати предлогот на градоначалникот Андреј Жерновски. Оваа награда во иднина редовно ќе се доделува на физички и на правни лица од Центар, за достигнувања во областите како стопанство, наука, уметност, култура, спорт, воспитување, образование и други.
Антиќ е жител на Општина Центар, основно училиште заврши во „Јохан Хајнрих Песталоци“ и тој е првиот македонски спортист со три освоени евролигашки титули. Играчката кариера ја почна како младинец во Работнички, каде што остана од 1999 до 2001 година. Тој е првиот и засега единствен роден Македонец кој играл во НБА-лигата, а беше и еден од најзаслужните за успехот на македонската репрезентација на Евробаскетот во Литванија, во 2011 година.
„Перо е голем спортист и човек и сметам дека првата ваква награда треба да му припадне токму нему“, напиша Жерновски на Фејсбук.
Првиот човек на Општина Центар во последните две години често ги посетува мечевите на Фенербахче во Истанбул, а тој и Антиќ имаат голема заслуга за гостувањето на Фенербахче на 70-годишнината од формирањето на Работнички.