Во МЗТ Скопје Аеродром велат дека во претстојната сезона, сè освен двојна круна на домашните натпреварувања и забележителен настап во АБА- лигата, ќе го сметаат за неуспех. Пред тренерот Александар Тодоров е задача да состави што е можно подобра екипа со главнина од Македонци, без да има потреба од шестмина странци. Во МЗТ веруваат дека има доволно квалитетни домашни играчи кои, надополнети со неколкумина странци и со поддршка од трибините, ќе може да ја имаат главната улога на домашната сцена, а нема да се посрамотат ниту во регионалната лига, каде што нема да има слаби екипи.
Засега, МЗТ ги ангажираше тренерот Тодоров и репрезентативецот Дамјан Стојановски, како надополнување за нашите репрезентативци Адем Мекиќ и Марко Симоновски, како и американскиот бек Ксавиер Темс, кои имаат договори и за следната сезона. Во наредниот период, клубот ќе доведе и други домашни играчи (на листата на желби се сите слободни македонски играчи што нешто значат), а потоа ќе ги пополнува празнините со странци.
Очекувањата на управата се големи, особено во делот на продолжување на доминацијата во првенството и враќањето на трофејот од Купот. Целиот фокус ќе биде на АБА и на македонската лига, па затоа клубот реши да не се пријави на ниту едно европско натпреварување како Еврокупот или Лигата на шампионите.