Екипите на Бостон селтикс и на Филаделфија 76 ерс на 11 јануари 2018 година ќе одиграат официјален натпревар од регуларната сезона во „О2 арената“ во Лондон. Овие два ривала од атлантската дивизија ќе ја одбележат петгодишнината откако НБА почна со „глобалните игри“ во британската престолнина. Досега во Лондон се имаат играно осум меча од регуларната сезона и сите што играле, имаат позитивно искуство. Желбата е постепено да расте бројот на НБА-мечеви кои ќе се играат на европскиот континент.
Во минатата сезона, надвор од САД и од Канада, се играа и два меча во Мексико Сити. Во НБА размислуваат во иднина, среде сезона, да организираат турнир во Мексико.
Иако уште не е „мртва“ идејата за проширување во Европа, во НБА не се откажуваат еден ден во своето друштво да примат клуб од Стариот Континент. Најголем проблем се логистиката и начинот на организирање на мечевите на екипи од два различни континента.