Немаше никакви дилеми дека Марин Докузовски и во следната сезона ќе биде тренер на Работнички, а вчера само се официјализираше нивната соработка. Трофејниот клуб во кој Докузовски мина најголем дел од кариерата, најавува подобри времиња и зголемен буџет, а со тоа и поголеми амбиции.
Поранешниот македонски селектор првпат седна на клупата на „црвено-белите“ од „Градски парк“ во 1994 година и таму остана до 2000. Потоа се врати во сезоната 2003-2004, па од 2007 до 2009, кратко беше и во 2011, кога го освои Купот на Македонија. Од есента 2014 година наваму, тој без прекин е тренер на Работнички. Поврзаноста на Докузовски со клубот и со неговите навивачи е нераскинлива и во клубот не ни размислуваа на друга опција за тренерската функција.
Првиот човек на Општина Центар, Андреј Жерновски, на Фејсбук се пофали дека и во наредниот период „докторот“ Докузовски ќе биде тренер на Работнички, а за претстојната сезона обезбедиле најголем буџет откако е ова раководство. По 13 години, Работнички повторно ќе игра европски клупски куп кој е под капата на ФИБА. Датумот кога ќе се влече ждрепката за квалификациите за ФИБА Европа купот, уште не е познат.
Досега договорите ги продолжија ветераните Ѓорѓи Чековски и Димитар Мираковски и младиот Виктор Ефремоски, ново име е Бојан Крстевски, а си заминаа Ненад Мишановиќ (на Кипар) и Владо Илиевски, кој реши да се повлече.