МЗТ Скопје Аеродром ја прифати поканата на турскиот прволигаш Бујукчекмеџе за гостување на турнир во Турција, кој го организира новиот клуб на македонскиот репрезентативен капитен, Војдан Стојановски. На турнирот закажан за 6 и за 7 септември, ќе учествуваат два турски прволигаша и два тима од АБА-лигата. Покрај Бујукчекмеџе и МЗТ, квартетот ќе го сочинуваат уште Истанбул ББ и загрепска Цибона.
Полуфиналните мечеви ќе се играат на 6 септември, а финалето и мечот за третото место - на 7 септември. Тоа ќе биде одлична можност за шесткратниот македонски првак да ги провери своите можности, а иако станува збор за средби од пријателски карактер во време кога тимовите се во фаза на подготовки за клупската сезона, ќе биде интересно да се види првиот дуел на Војдан против неговиот брат близнак, Дамјан Стојановски. Тие двајца досега не играле еден против друг во различен дрес на некој официјален натпревар.
МЗТ Скопје е во потрага по нов плејмејкер откако Холанѓанецот Шарлон Клоф потпиша договор со шпанскиот прволигаш Мурсија. Клоф беше МВП на финалето на плејофот и добрите игри во дресот на МЗТ беа препорака да замине во далеку посилна лига и во клуб со поголем буџет.