Првиот дуел во претстојната сезона помеѓу најдобрите екипи во НБА-лигата и финалисти од 2017, Голден стејт и Кливленд, ќе се игра на 25 декември. Лигата ги објави петте натпревари кои се закажани за католичкиот Божик, а најголемо дерби е она помеѓу Кавалирс и Вориорс, кое ќе се игра во арената „Квикен лоунс“ во Кливленд.
Другите четири меча се Филаделфија - Њујорк, Вашингтон - Бостон, Хјустон - Оклахома сити и Минесота - ЛА лејкерс. Филаделфија за првпат после 16 години ќе игра на Божик, Селтикс првпат во својата историја ќе игра дома на овој датум, ќе се гледа пресметка меѓу двајцата кандидати за МВП на минатата сезона, Вестбрук против Харден, а пред спиење, публиката ќе го проследи дуелот на Лејкерс со клубот од градот во кој „езерџиите“ играа како домаќини во далечното минато.
Претстојната сезона почнува невообичаено рано, на 17 октомври, и тоа е најран старт на регуларната НБА- сезона во последните 37 години. Во 1980 година, сезоната почна на 10 октомври. Идејата за подранетиот старт е играчите да имаат повеќе денови одмор. На вториот ден од сезоната, на 18 октомври, Филаделфија гостува во главниот град на САД и може да има несекојдневна ситуација на тој меч, во лигата да дебитираат два први пика на драфтот (ланскиот Бен Симонс и годинашниот Маркел Фулц).