До почетокот на Европското кошаркарско првенство остануваат уште 16 дена, а овој период поголемиот дел од земјите учеснички го користат за одигрување на контролни натпревари. Една од нив е и репрезентацијата на Хрватска која покажува дека е во одлична форма.
Популарните „коцкести“ триумфираа на турнирот кој се одржа во Опатија. Откако прво ја победија Словенија (95-91), кошаркарите на Хрватска славеа победа и над Украина со 79-74.
За тимот предводен од селекторот Александар Петровиќ , ова беше седма победа во осумте одиграни натпревари во подготовките. Хрватите претходно на гостински терен ги победија Франција и Литванија со што најавија дека повторно ќе бидат едни од конкурентите за највисок пласман на Евробаскетот кој стартува на 31 август.
Хрватска во групната фаза ќе игра во Клуж Напока против ко-домаќинот Романија, Црна Гора, Шпанија, Чешка и Унгарија.