Уште една ѕвезда на НБА веројатно ќе ги пропушти натпреварите до крајот на сезоната. Овојпат станува збор за лидерот на Сан Антонио, Каваи Леонард.
Крилото не играше во првите два месеца од кампањата, а по враќањето на теренот за неколку натпревари, сега е надвор од тимот веќе месец и половина.
Леонард има повреда во десниот бут, која очигледно е доста сериозна и тој не сака да ризикува каква било компликација на проблемот, иако има опција и да се врати. Кошаркарот продолжува да ги истражува различните опции и се консултира со специјалисти, бидејќи постои веројатност и да биде опериран.
- Нема многу натпревари до крајот на сезоната и тој сè уште не е подготвен. Има минимални шанси да се врати, но, искрено, ќе бидам многу изненаден ако тоа се случи, рече тренерот Грег Поповиќ.
Без Леонард, кој е одличен дефанзивец, Сан Антонио нема големи шанси против фаворитите на Западот - Голден Стејт и Хјустон. „Спарси“ сега се трети со скор од 35-24, но нивната позиција во топ 4 воопшто не е загарантирана.
Отсуството на Каваи ќе значи дека уште една голема ѕвезда која ги пропушта дуелите до крајот на кампањата, откако поради сериозни повреди тоа ќе го направат ДеМаркус Казнс и Кристапс Порзингис.