Кошаркарите на МЗТ парично казнети

Управата на МЗТ Скопје Аеродром одлучи да ги казните играчите и тренерите со 50-отсто од нивните месечни примања поради лошите резултати остварени сезонава во АБА-лигата и во домашното првенство, соопштено е на клупскиот сајт на „сино-белите“.

МЗТ Скопје Аеродром оствари само три победи и завршивме на последното место во регионалното натпреварување, а во досегашниот дел од домашното првенство веќе има шест порази.

- Ова е мерка предвидена во Дисциплинскиот правилник на клубот, која се надеваме дека позитивно ќе делува кај играчите и членовите на стручниот штаб во пресрет на одлучувачкиот дел од шампионатот на Македонија во кој ја бркаме седмата титула по ред. Кошаркарите и тренерите се свесни дека остварените резултати во досегашниот дел од сезоната се под очекувањата и реномето на МЗТ Скопје Аеродром и најавуваат далеку подобри игри со цел да ги остварат целите на клубот, а со тоа да донесат радост кај нашата навивачка армија, велат од МЗТ.

Истовремено, луѓето кои го предводат тимот од Аеродром ја потврдија довербата која ја имаат во тренерот Жељко Лукајиќ, за кого велат, место на клупата воопшто не е загрозено.

- Тој ја има максималната поддршка на сите во клубот за до крајот на сезоната, што дефинитивно треба да биде мотив плус за него, но и за неговите избраниците брзо да ја надминат кризата и да почнат да играат онака како што знаат и како што од нив очекуваат сите на кои низ вените им тече сино-бела крв, додаваат од „Јане Сандански“.