Претседателот на Република Македонија Ѓорге Иванов денеска донесе Указ со кој се одликуваат членовите на Македонската кошаркарска репрезентација со „Медал за заслуги за Македонија“.
Одликувањето е за постигнатите врвни резултати во кошарката на меѓународен план, со што, македонската кошаркарска репрезентација, како што соопшти Кабинетот на Претседателот, даде исклучителен придонес за развој и популаризација на овој спорт во земјата и афирмација на Република Македонија во светот.
Македонскиот претседател во телефонски разговор со селекторот на кошаркарската репрезентација Марјан Докузовски го известил за Одлуката за доделување орден за заслуги за Македонија на членовите на репрезентацијата. Селекторот Докузовски, како што велат од Кабинетот на претседателот, се заблагодарил на укажаната чест.
Претседателот Иванов оценува дека орденот за кошаркарската репрезентација е заслужен со досегашните игри на првенството.