Раководството на Кливленд кавалирс планира во текот на оваа седмица да го потпише договорот со својот прв избор на драфтот, Ендрју Вигинс, објавија неколку извори блиски до клубот од Охајо.
Според ЕСПН, од Кавалирс признале дека доцнат со реализација на овој трансфер со некогашната ѕвезда на Универзитетот Канзас. Но, не поради евентуален негов трејд во Минесота за кој се зборува со денови наназад, туку поради „отворање“ на дополнителен простор во „селари-капот“потребен за трансфер на уште еден кошаркар.
Односно сума од 1.4 милиони долари, по што би се пристапило кон потпис на договорот од кој, според „руки-скалата“ во НБА лигата, Вигинс како прв пик на драфтот има загарантирани 5.5 милиони долари во првата година од играњето во НБА лигата.
Вигинс е еден од играчите кои во текот на летниот период можат да си заминат од Кливленд, односно да биде употребен како дел од најавената размена која вклучува доаѓање на ол-стар крилото на Минесота, Кевин Лов.