Скопје, 28 јули 2014 (МИА) - Македонката кошаркарска репрезентација ја победи Црна Гора со 65;58 и го освои второто место на турнирот „Трофеј Македонија“ што изминатите три дена се одржа во Скопје. Ова беше последниот подготвителен турнир пред стартот на квалификациите за Евробаскетот.
Ричард Хендрикс со дабл-дабл учинок од 13 поени и 10 скокови беше најефикасен во нашиот состав, во кој десетмина кошаркари се запишаа во листата на стрелци.
Реализацијата беше проблем во нашиот тим и на овој натпревар, но уште еднаш избраниците на Александар Џикиќ знаеја како со квалитетна одбрана да го примораат противникот на голем број грешки (18 загубени топки), преку кои постигнаа 17 поени од контра-напади.
Македонија турнирот го заврши со две победи (Црна Гора и Полска) и еден пораз (Италија). Победнике е италијанската репрезентација, трета е Црна Гора, а последна Полска.
До 10 август и мечот против Белгија во Скопје, нашата репрезентација ќе одигра уште еден пријателски меч, кога на 5 август ќе се сретне со Хрватска во Загреб.