Македонската кошаркарска репрезентација го доживеа првиот пораз во квалификациите за Европското првенство 2015. На гостувањето кај Белгија синоќа Македонија загуби со 63:60 (12-11, 21-12, 17-19, 13-18). И покрај поразот нашата репрезентација има реални шанси за пласман на Евробаскетот 2015 и потребно е да се совладаат селекциите на Данска и на Белорусија во Скопје.
Македонија добро го почна натпреварот и противникот беше тој што беше во негатива. Во таква ситуација нашите кошаркари имаа предност до финишот на првиот период. Сепак Белгија успеа да поведе, а во вториот период и го зголеми водство, кое на полувремето беше десет разлика (33:23).
Во вториот дел македонските кошаркари имаа нешто подобар шут за три поени и успеаја да го го намалат водството на домаќинот, но грешките и понатму беа присутни во играта на избраниците на селекторот Александар Џикиќ. Во 35.минута Македонија се доближи и на еден негатива (52:51), но немаше сили за пресврт како во Скопје со истиот ривал.
Белгија во завршницата ја зачува предноста и дојде до третата победа исто колку што има и Македонија. Во составот на Македонија Ричрад Хендрикс со 14 поени и истотолку скокови беше најефикасен, додека кај Белгија Максим Де Зеув имаше 13 поени, а Алекс Ервеле 11 поени и 10 скокови. Македонија направи вкупно 25 грешки, додека Белгија имаше 16.
На вториот натпревар од Д групата Белорусија ја победи Данска на гости со 73:66.
На табелата Македонија и Белгија имаат по 7 бодови, Белорусија 6, Данска 4.
Следниот натпревар Македонија го игра на 24.август (недела) во Скопје против Данска.