Македонија ја совлада Данска, очекувано, или онака како што тоа од своите избраници го (по)бара селекторот Александар Џикиќ.
Без потценување на ниту еден противник, на ниту една селекција во квалификациите квалификувана како аутсајдер.
„Школата“ која ја имавме во Хорсенс беше само најава, нешто што донесе своевиден „приемен испит“ на таа тема, кој избраниот тим на Џикиќ пред својот аудиториум во Арената во Скопје беше успешно положен.
Македонија победи и со убедливи 80:46, потребни во онаа трка за првата позиција на табелата во групата „Д“. Онија во која за „милиметар“ и понатаму води Белгија, која има и плус десет поени во својот кош-количник, а пред разврската в среда.
Победи ли Македонија на истиот овој терен против Белорусија, по четвртипат по ред ќе биде дел од ЕП. Од првата или втората позиција на табелата ќе чекаме на резултатот од другиот меч во кој Данска ја дочекува Белгија, која е веќе обезбедена.
А „темата“ ја одработивме постепено. Од минута во минута го симнувавме отпорот на само борбените Данци, кои, патем кажано, во Скопје допатуваа и играа само со деветмина кошаркари.
Но, и тие парираа, но само во првото полувреме, и некои минути од третиот период. Се бранеа сè таму до оние 11:11 во уводната четвртина, кога тргна првата наша серија (8-0) за првото поголемо одвојување (19:11). На почетокот на вториот имавме за првпат и двоцифрена предност (24:13), која ја одржуваме до полувремето (41:29).
Последниот обид „викинзите“ го имаа на почетокот на третата четвртина, во кој дојдоа на само пет поени негатива (40:45).
Сè друго беше на наша страна, на која беше новата серија од девет неодговорени поени за сосема комфорни 54:40.
Тоа, пак, означи едно целосно „отворање“ на студентите на Џикиќ во оние последни 10 минути. Една поентерска ерупција претворена во 20 плус (26:6) и уште поубедливи 80:46, доволни за повеќе од преодна оценка.
„Дипломирањето“ го чекаме в среда навечер, на истото место.