Тодор Гечевски и Ѓорѓи Чековски се појавија на првиот тренинг на Работнички со кој тимот на некој начин ги стартуваше подготовките за новата сезона во која најтрофејниот клуб посакува освојување на титулата во македонското првенство. Гечевски и Чековски во претходните три сезони беа членови на МЗТ Скопје Аеродром со кој освоија три титули, но по намалувањето на буџетот и најавеното подмладување, решија да прејдат во редовите на најголемиот ривал. За нив двајца играњето за Работнички и за тренерот Марин Докузовски не е ништо ново бидејќи во минатото имаат често соработувано со него на клупска и репрезентативна сцена.
Со појавувањето во „Градски парк“ се потврдија шпекулациите оти Гечевски и Чековски кариерата ќе ја продолжат во Работнички кој ќе има состав со кој ќе атакува на трофеите во домашното првенство. Официјално тие уште немаат потпишано договори со вицепрвакот, но се чини дека тоа е само формалност. Покрај нив двајца, на првиот собир на Докузовски и помошниците Марјан Србиноски и Марко Величковиќ се појавија и искусните Димитар Мираковски и Марјан Ѓуров, како и играчи од младинскиот состав. Во тимот ќе бидат и Јане Петровски и репрезентативците Дарко Соколов и Марко Симоновски. Во наредните денови управата ќе треба да поработи на доведување на нови засилувања за комплетирање на составот по што екипата би почнала со посериозни подготовки и одигрување пријателски натпревари.
Првиот тренинг на „црвено-белите“ беше збогатен и со присуство на неколку стотини навивачи кои полни со оптимизам и со песна порачаа дека сезонава ја чекаат титулата која Работнички ја нема освоено веќе пет години.