Кошаркарскиот клуб МЗТ Скопје Аеродром ќе пушти во продажба сезонски билети за претстојната сезона во која тимот ќе игра во домашното првенство и АБА лигата. Цената на билетите е 2.200 денари и ќе важи за сите домашни средби на МЗТ во претстојната сезона.
Продажбата на сезонски билети, што е новитет за аеродромскиот клуб кој очекува подобра посета откако се врати во сала во матичната населба, ќе трае од 17 до 28 септември, на билетарницата во спортскиот центар „Јане Сандански“ од 12 до 20 часот.
Ако се пресмета дека МЗТ ќе одигра најмалку 22, а најмногу 32 средби во својот нов дом, тогаш се доаѓа до заклучок дека ќе треба да се издвојат помалку од 100 денари по меч. За некои поединечни средби, пред сé од Јадранската лига, цената на еден билет сигурно ќе биде повисока, па затоа потегот со сезонските билети е добар за оние најредовните.
Интересна новина е што оние навивачи што ќе имаат сезонски билети за оваа сезона ќе имаат дополнителен попуст при купување на сезонски билети за 2015/2016, и можност за купување на истото место за седење, ако сметаат дека тоа им носи среќа.