Кога Војдан Стојановски е на терен тој е убиец. Спротивно на тоа, неговото однесување надвор од теренот изгледа сосема поинакво. Вака интернет страницата „Алба Инсајд“ го почнува воведот во интервјуто со македонскиот кошаркар кој веќе втора сезона ќе го носи дресот на Алба Берлин.
„Кога дознав дека Алба сака да ми го продолжи договорот бев среќен затоа што се чувствувам многу удобно овде. Обрадовиќ е тренер кој сака да види агресивна одбрана, и ако го слушате и ги спроведувате на неговите барања, ќе немате проблеми. Јас сум тивок по природа, спротивност од него, но добро функционираме. Алба е најголемиот клуб за којшто сум играл, сега правам чекор напред со играњето во Евролигата“ - вели Војдан, кој ги фали организацијата и дисциплината во клубот.
Германците ги интересираа и настапите на Војдан за националниот тим.
„Кошарката е спорт број 1. Фудбалот не е најпопуларен бидејќи немаме толку многу добри играчи, освен можеби Горан Пандев. Во кошарката имаме играчи како Перо Антиќ, кој игра во НБА, или Владо Илиевски, Бо Мек Кејлеб. Ракометот исто така е многу популарен кај нас“ - објаснува Стојановски.
За односот со неговиот брат близнак Дамјан, Војдан вели дека ривалството постои и уште кога биле деца многу играле „еден на еден“. Запознал многу Македонци во Берлин кои му помагале на почетокот да се снајде и прилагоди полесно.
На Војдан не му е проблем што во Алба средбите ги почнува од клупата.
„Се чувствувам подобро кога ќе влезам во игра од клупата за резерви. Откако Обрадовиќ ми е тренер, не сум во почетната петорка. Во првите 5-6 минути од страна гледам како игра противникот, и кога ќе влезам, веќе знам што може да се очекува и какви се добрите и слабите страни на ривалот“ - завршува Стојановски.