Само неколку дена откако го урнаа рекордот на лигата по број на постигнати поени во еден натпревар и по висината на победата (во дуелот со Калев, 114-51), кошаркарите на Локомотив Кубан, предводени од нашиот репрезентативец Ричард Хендрикс стигнаа до уште еден голем триумф. Ја совладаа и московска ЦСКА. На домашен терен беше 81:73 за популарниот „Локо“, кој засега е на стонастотен ефект во делот од сезоната наречен ВТБ лига.
Хендрикс одигра одлично на двата краја од теренот. Особено добро во завршницата од натпреварот кога погоди неколку важни шутеви. А со 12 постигнати поени, на кои додаде 11 скокови, една блокада и две освоени топки беше најефикасен во победничката екипа која и во оваа пригода покажа дека подготвена го дочекува и стартот на натпреварите во Еврокупот предвиден за денеска и утре.
Согласно со календарот, во првото коло од Еврокупот, тимот од Краснодар гостува на полската Зиелона Гора. И важи за еден од топ фаворитите во ова натпреварување во кое се случија мали измени во форматот, кој сега е намален на 36 екипи кои ќе се натпреваруваат во две конференции, источна и западна.
Оваа сезона ќе почне вечерва, и тоа со два натпревари. Првиот е во Германија, каде Артланд Драгонс го пречекува Асвел, додека, пак, вториот е на Канарските Острови, во кој ќе се сретнат Гран Канарија и Канту.