Ѓорѓи Цинцадзе од денеска веќе нема да биде член на МЗТ Скопје Аеродром бидејќи се очекува да го потпише раскинувањето на договорот откако тоа во текот на вчерашниот ден веќе го направи менаџерот на грузискиот репрезентативен бек. Цинцадзе не ги прикажуваше очекуваните игри од него, а и самиот бил незадоволен од престојот во Скопје, па клубот и кошаркарот решија да се разделат. Последен меч на Цинцадзе во дресот на МЗТ беше гостувањето кај Крка кога не постигна кош, а имаше шест асистенции.
Затоа, пак, во следните две недели на проба ќе биде Американецот Дион Диксон, кој синоќа допатува во македонската престолнина. Диксон денеска почнува со лесни тренинзи и ќе му бидат направени задолжителните лекарски прегледи. Ако сè оди според планот, тој ќе биде во составот на „штрковите“ на неделниот меч со Цедевита во „Јане Сандански“. Новиот играч на МЗТ доби рок од две недели да ги убеди управата и стручниот штаб дека е квалитетен и само така ќе му биде понуден договор за до крајот на сезоната.
Најголема мистерија засега е дали Дамјан Стојановски повторно ќе игра за аеродромскиот клуб. Репрезентативецот уште тактизира и се ценка со „металците“, но според најавите, дефинитивниот одговор треба да го даде денеска или утре. Ако реши да каже да, тогаш и Дамјан ќе може да биде на листата на играчи за дуелот со Цедевита в недела. МЗТ има желба да го привлече кошаркарот кој во претходните две сезони настапуваше за македонскиот првак, но висината на платата и менаџерската агенција беа главни пречки поради кои и кон крајот на октомври уште нема конечна разврска на оваа „сапунска опера“.