Македонската репрезентација своите противници за Евробаскетот 2015 ќе ги дознае на 8 декември за кога е закажана ждрепката во Дизниленд во Париз. Тогаш ќе знаеме и каде нашите кошаркари ќе ги играат натпреварите од првата фаза. Првата рунда од ЕП 2015 ќе се игра во дури четири земји (Германија, Франција, Хрватска и Летонија), а завршницата е во градот Лил во Франција. Загреб е најблиската варијанта, Рига е најдалечна, а опции се уште Берлин и Монпелје.
„Црвено-жолтите“ се во четвртиот шешир, што значи дека за да ја минат групата ќе мора да бидат подобри од барем една селекција која е подобро рангирана.
ФИБА Европа одлучи извлекувањето за изгледот на групите на ЕП да се случи во една од најпознатите забавни атракции во Европа, во европскиот Дизниленд, со почеток во 16 часот. Ждрепката за претходното ЕП во Словенија се одржа под земја, во Постоинска јама, па и Французите сакаа да организираат уникатна ждрепка за паметење.
Македонија откако успешно ги мина квалификациите против Белгија, Белорусија и Данска, ќе биде во една од четирите групи со по шест тима во првата фаза, на Евробаскетот кој ќе се игра од 5 до 20 септември. Првенството ќе биде многу значајно и поради тоа што финалистите одат директно на Олимпските игри во Рио 2016 година, а тимовите пласирани од трето до шесто место ќе играат квалификации за олимпискиот турнир.