Американското крило со македонски пасош Кенеди Винстон потпиша договор со мексиканскиот клуб Алконес УВ Халапа, тим кој во моментов е четврти во првенството со биланс од девет победи и пет порази. Винстон има 30 години, пред неколку години доби и македонски кошаркарски пасош со што се стекна со право да игра и за нашиот национален тим, но селекторите немаа голема потреба од него, па ги повикуваа Лестер Мек Кејлеб и Ричард Хендрикс.
Последен клуб на Винстон му беше францускиот Антиб. На 11 меча во француската лига во минатата сезона, имаше просек од 12,3 поени, 3,7 скока и 3,2 асистенции по натпревар. Тој се обиде да добие договор во либанската лига, но во клубот Амчит остана само во подготвителниот период, а беше на проба и во италијанскиот Реџо Емилија.
Во сезоната 2012/2013, Винстон играше за француски Гравлен Данкерк со кој го освои Купот на Франција и беше прв во регуларниот дел на сезоната. Во Еврочелинџ купот, стигнаа до полуфиналето. Пред тоа ги носеше дресовите и на Теленет Остенде, Гранароло, Панатинаикос, Паниониос, Реал Мадрид, Гран Канарија, Турк Телеком и Болоња.
Станува збор за играч кој е добар скокач и солиден шутер, но не ги оправда очекувањата играјќи за европски клубови, веројатно затоа што играше слаба одбрана, нешто на што за инсистира на оваа страна од Атлантикот.