Еторе Месина стана првиот европски тренер кој водел екипа во натпревар од регуларната сезона во НБА лигата. Здравствените проблеми на Грег Попович беа причина што тој не можеше да седи на клупата на Сан Антонио на дуелот со Индијана, па кормилото го презеде помошникот Месина, кој летово дојде во стручниот штаб на Спарс. Технички, Италијанецот не е првиот тренер роден во Европа кој водел НБА тим бидејќи Кики Вандевеге е роден во Германија и привремено го водеше Њу Џерси во 2009/2010. Но, 55-годишниот Месина е целосен продукт на европската култура и кошарка, и има големо искуство и освоени трофеи на Стариот континент. Со Киндер Болоња освои две титули европски првак, а тогаш, пред 13 години за тимот играше Емануел Џинобили, актуелен член на Спарс. Џинобили со 28 поени, од кои 21 во второто полувреме, бешем творец на триуфмот.
„Му реков на Ману дека ми должи една победа во кариерата. Тој беше неверојатен, го имаше насекаде. Не само со кошаркарско знаење, неговите желба и труд се бесценети“ - изјави Месина.
Торонто дојде до својата шест победа по ред, а овој пат жртва на „рептилите“ беше Атланта на Перо Антиќ, која падна по петминутно продолжение. Македонецот одигра 17 минути во кои имаше 5 поени и три скока.
Од завчерашните средби, за истакнување се и деветтата победа по ред на Портланд, скорот на Мемфис порасна на 13-2, а Филаделфија со 0-15 го изедначи неславниот клупски рекорд. Синоќа во НБА не се играа натпревари бидејќи во САД се славеше Денот на благодарноста.