Иако има само 21 година, Александар Цветковиќ ја игра својата петта сезона во АБА-лигата и во интервју за веб-страницата на лигата, плејмејкерот на МЗТ Скопје Аеродром зборува за својот сегашен клуб, одлуката да ја напушти Црвена звезда, и неговите идни планови.
Со само 17 години дебитираше во АБА-лигата, и постојано напредува како играч.
„Ја имав таа среќа и привилегија со свои 17 години да заиграм во ваква квалитетна лига. На почетокот беше тешко да се изборам и да играм со таквите добри и искусни играчи, а од друга страна секој ден сè повеќе и повеќе напредував“, вели Цветковиќ.
Кошаркарот што го носи дресот на МЗТ со број 55, кариерата ја почна во младинските категории на Црвена звезда телеком, потоа заигра и за првиот тим од каде дојде во редовите на македонскиот првак.
„Сон на секое дете е да игра во голем клуб како што е Црвена звезда. Беа тоа седум години кои многу придонесоа во развојот на мојата професионална кариера“, смета популарниот Цвеле.
Кога се одлучи да замине од Звезда и да му се приклучи на МЗТ Скопје, не знаеше во каков правец ќе му се движи кариерата, но сега во скопскиот клуб доби важна улога во тимот и од денешна перспектива, смета оти го направил вистинскиот избор.
„Мислам дека донесов вистинска одлука со доаѓањето во МЗТ Скопје. Исто така мислам дека улогата која ја добив во тимот уште повеќе присонесе во мојот напредок. Во МЗТ ми се допаѓа тоа што сме како една голема фамилија. Управата, играчите, навивачите, канцеларијата, сите заедно ги делиме и добрите и лошите моменти. Заминувањето од Белград не ми падна толку тешко затоа што овде сум одлично примен и се чувствувам како дома“ - објаснува Цветковиќ.
Тој не сака да прави долгорочни планови за иднината.
„Не би сакал да правам долгорочни планови. Сите мои планови засега се врзани само со МЗТ Скопје Аеродром“, завршува Цветковиќ.