Коби Брајант изби на третото место на вечната листа на стрелци во НБА-лигата, надминувајќи го Мајкл Џордан. На 5,24 минути до крајот на втората четвртина, Брајант погоди две слободни фрлања со кои го претекна Џордан, кој за многумина е најдобриот кошаркар на сите времиња. Средбата на ЛА Лејкерс со Минесота беше прекината за Коби да добие овации од публиката и да му биде подарен баскетот со кој го даде кошот. Сега повеќе поени од Брајант имаат постигнато само Карим Абдул Џабар и Карл Мелоун. Џабар и Мелоун се недостижни, но надминувањето на Џордан беше голема причина за славје.
Во 1996 година, кога Брајант како 17-годишен се појави во НБА, веднаш му предвидуваа блескава иднина и го најавуваа како наследник на Џордан. Тие двајца играа еден против друг осум пати и скорот е 5-3 за помладиот. Сепак, Џордан има шест титули, една повеќе од Коби, и десет пати беше прв стрелец во лигата, а Брајант само двапати. Брајант е бекот што најдобро знае да го изведе оној шут со скок наназад, кој беше заштитен знак на Џордан, а кога беше помлад, Коби го имитираше Џордан и со вадењето на јазикот при влезови кон противничкиот кош.
На Коби за да дојде до 32.292 поени му требаа 1.269 меча, 230 повеќе од Џордан. Интересно е што Брајант до надминувањето на Џордан дојде во Минеаполис, првиот град во кој Лејкерс играа како домаќини, пред преселбата во Лос Анџелес во 1960 година, а истотака Коби и својот прв меч во НБА го одигра против Тимбервулфс.