Да се продолжи сонот наречен евролигашки плеј-оф. Тоа е главната замисла за берлинска Алба пред вечерашното ново гостување, она во Истанбул, каде од 19 часот како противник ги дочекува Галатасарај.
А во сосема две различни расположенија го дочекуваат овој меч од 4. коло. Победничко што се однесува за турскиот состав, и поразитено за германскиот. Пред една седмица „Галата“ го освои Белград. Ја победи Црвена Звезда, што е втор успех за тимот од Босфорот во ТОП 16 фазата, додека, пак, Алба во Берлин не најде начин да изненади топ-екипа каква што несомнено има Реал Мадрид.
Од тие причини турскиот состав е во мала предност, момент што го признава и тренерот на „албатросите“, Саша Обрадовиќ, кој во најавата за мечот истакнува дека овој тим на Галатасарај е многу подобар од „претходниот“. Но, и тоа дека новите играчи донеле посебен квалитет кој е претворен во две победи од оваа нова фаза во Евролигата.
Дербито на групата „Е“ е во Мадрид, каде Реал го дочекува сè подобриот Панатинаикос (од 20.45 часот). Непобедливите „кралеви“ маршираат кон првата позиција која носи полесен противник во четвртфиналето, но и ПАО најави враќање на „старите патеки“.
Во исто време, но во Милано, можеби и уште поинтересно се очекува да биде и во дуелот во кој Армани ќе се брани од нападите на Фенербахче Улкер.
Некој час порано (од 18), ЦСКА треба да ја потврди фаворитската улога против Уникаха, една од ретките екипи (заедно со Црвена Звезда) која е без победа во овој дел од Евролигата.