Војдан лидер на петорката на колото во Шпанија

Со 26 индексни поени на корисност, Војдан Стојановски заедно со Руди Фернандес од Реал Мадрид се најдобри играчи на 22. коло во шпанската лига. Интересно е што во Шпанија во битка за МВП на колото конкурираат само кошаркари на екипи кои извојувале победа. Подобар индекс од Војдан и Руди имаше Вили Ернангомес од Севилја, но тој не е прогласен играч за играч на колото бидејќи тимот за кој настапува претрпе пораз.

Во петорката на колото, покрај Стојановски, Фернандес и Ернангомес се најдоа и Хавиер Беиран од Тенерифе и Раулзињо Нето од Мурсија. За секој од нив петмина има по нешто со што се истакнале, а кај Стојановски стои зборот „лидерство“, што укажува дека се истакнал во тој дел.

Стојановски на својот трети натпревар во дресот на Морабанк Андора успеа да дојде до првата победа по трансферот од бундеслигашот Алба Берлин во клубот од малата пиринејска земја. Стојановски покажа дека брзо се адаптирал во новата средина, и оти е екстра големо засилување за екипата која грчевито се бори за опстанок во АЦБ лигата.

Војдан на дуелот со Манреса постигна 24 поени за 28 минути и 33 секунди на терен. Повеќе поени од него во ова коло даде само Стив Бурт, член на Фуенлабрада.

Со тројка на Стојановски беше отворен натпреварот меѓу Морабанк и Манреса, а тоа беше прва од четирите негови тројки во текот на средбата. За двојка имаше реализација 3/5, а од линијата за слободни фрлања имаше перфектни 6/6. Војдан имаше и две асистенции кои неговиот соиграч Шон Грин ги претвори во две тројки и шест поени. Во одбраната Македонецот помогна со два скока и две освоени топки. Над него беа направени седум лични грешки, и сето тоа во статистиката му донесе 26 индексни поени. Исто толку имаше и Руди, еден од најдобрите и најскапи играчи во Европа.

Во следното коло Морабанк гостува кај евролигашот Лаборал Куча, и тимот од Виторија ќе мора многу да внимава на Македонецот ако сака да ја оправда фаворитската улога.