Спортскиот арбитражен суд (САС) при Македонскиот олимписки комитет (МОК) би можел да се состане и пред одржување на најавеното вонредно собрание на Македонската кошаркарска федерација (МКФ), спомнаа дел од членовите на Управниот одбор на МКФ. Според информациите до кои дошле претставниците на Иницијативниот одбор кој сака да го разреши Даниел Димевски од функцијата претседател на МКФ, еден од судиите членови на САС треба да се врати во Македонија на 5 април, па ако тој или наредниот ден судот се состане и донесе одлука во врска со легалноста на иницијативата за свикување Собрание, би можело на 7 април да се знае ставот.
Иницијативниот одбор за 7 април закажа седница на Собранието на МКФ, а претседателот Димевски рече оти ако САС пресуди во полза на иницијаторите, тој ќе закаже Собрание во најкраток рок од 7 дена. Доколку САС смета оти Димевски е во право, тогаш актуелниот претседател ново Собрание ќе свика по Евробаскетот во септември, но Иницијативниот одбор не се согласува со таков развој на настаните и засега цврсто стои на ставот дека има право да побара и одржи Собрание.
САС, кој работи под капата на МОК, е формиран кон крајот на минатата година и задолжен е да посредува во сите спорови, на релацијата спортисти - клубови - национални спортски федерации, кога ќе се јави потреба за такво нешто. Времетраењето на решавање на споровите може да трае најмногу 12 месеци.
Вакви спортско-арбитражни судови постојат во рамките на повеќе национални олимписки комитети во светот, и тоа по налог на Интернационалниот олимписки комитет (ИОК). Претседател на македонскиот САС е професорот на Правниот факултет во Скопје, Тони Дескоски. Одлуките на САС при МОК се конечни и не може да бидат обжалени на друга правна инстанца во Македонија.