Еден фан на Динамо Загреб е повреден а 24-ца се уапсени по синоќешните судири со фановите на ПСЖ, во Париз, јавија француските медиуми.
Околу 80 хулигани кои пристигнале во Париз синоќа се судриле со домашните фанови на улиците на главниот град на Франција, а полицијата воспоставила мир дури по полноќ.
Полицијата морала да интервенира на плоштадот Бастилја, а според очевидците биле употребени димни бомби и солзавец. Дел од очевидците објавија фотографии од судирите на фановите на своите Twitter профили кои ги нарекоа „Битка за Бастилја“.
Француските власти веќе им забранија влез во Париз на припадниците на навивачката група Bad Blue Boys, но според француските медиуми тие пристигнале во градот 1 ден пред да стапи забраната на сила.
Натпреварот ПСЖ- Динамо Загреб од четвртото коло во ЛШ ќе се одигра вечерва со почеток во 20.45 часот.