Екипите кои пред две години играа во четвртфиналето од Лигата на шампионите, ПСЖ и Барселона денеска ќе го одиграат својот прв меч во групната фаза. На „Паркот на принцовите“ во Париз шампионот на Франција го пречекува вицешампионот на Франција, а најголемата неизвесност е дали Златан Ибрахимовиќ ќе може да истрча на теренот и да го почне натпреварот.
Ова прашање ќе биде без одговор до моментот додека Лоран Блан не го соопшти составот со кој ќе тргне во натпреварот против Каталонците. Тој ќе ја чека одлуката на докторите, па потоа ќе знае дали со Ибра или без него влегува во битката.
ИГРАТА НА ПСЖ ЗАВИСИ ОД ИБРА
И додека Блан ја очекува информацијата за Ибрахимовиќ вели дека има надежи дека денеска ќе успее да го однесе својот тим до добар резултат.
„Имаме сериозни проблеми со повредени играчи. Тоа ни е голема пречка за да можеме да настапиме во комплетен состав и да можеме да бидеме далеку посилни. Во таква ситуација ќе беше сосема друга приказна. Сега мораме да размислуваме како ќе ѝ се спротивставиме на Барселона“, вели Блан.
Тој се нема откажано од тоа дека денеска ќе го има и Ибрахимовиќ во својот тим.
„Се надеваме дека ќе успееме да го оспособиме Ибрахимовиќ. Докторскиот тим работи напорно. За разлика од него Тијаго Силва нема да може да биде во составот бидејќи неговото заздравување оди многу побавно. Сепак, и со оние играчи коишто ги имаме ќе сториме сè за да забележиме позитивен резултат“, вели тренерот на ПСЖ.
ЕНРИКЕ ВНИМАТЕЛЕН ПРЕД МЕЧОТ
За разлика од Блан, Луис Енрике може да биде многу послободен пред денешната средба бидејќи играчите кои се во прв план се подготвени за настап и денеска ќе бидат на терен.
„Гледав неколку натпревари на ПСЖ и можам да кажам дека денеска ни претстои навистина тешка средба. Се соочуваме со силен ривал против кој ќе мораме да одиграме на високо ниво од почетокот до крајот на натпреварот. Мислам дека и во ПСЖ се свесни со кого се соочуваат, па ова е гаранција за убав натпревар“, вели Луис Енрике.
Покрај тоа не испушти шанса за да искоментира околу Златан Ибрахимовиќ и неговата повреда.
„Дефинитивно тој е многу важен играч за нашиот противник. Доколку тој игра тогаш нашата задаќа ќе биде многу потешка. Ако, пак, се случи да не може тоа ќе биде дефинитивно добра вест. Во секој случај очекувам да одиграме добар натпревар и да дојдеме до позитивен резултат“, изјави Енрике.
РАЗЛИЧНО РАСПОЛОЖЕНИЕ
Двете екипи играат во сосема различен ритам од стартот на сезоната. Барселона ја има најдобрата одбрана во Шпанија, која издржа и во првото коло од Лигата на шампионите без да прими гол. Шест натпревари се одиграни во Примера и на нив е забележана гол разлика од 17:0, а последната победа од 6:0 од саботата е најава за нова ефикасна средба. Во ЛШ во првото коло резултатот беше 1:0 против Апоел.
ПСЖ, пак, никако не може да врзе неколку средби во серија со победи. Дури и при последната средба во Лига резултатот беше нерешен 1:1. ПСЖ беше гостин кај Тулуз.