Кими Раиконен вели дека не е изненаден што е во центарот на бројни шпекулации бидејќи ги чита истите приказни за својата иднина од почетокот на 2015. Ферари сè уште не решиле да го продолжат неговиот договор за 2016, а Финецот се мачи да ги достигне перформансите на новиот колега Себастијан Фетел.
Валтери Ботас, Даниел Рикијардо и победникот од Ле Ман, Нико Хулкенберг се промовираат во први кандидати за негова замена.
„Очигледно, одлуката ќе ја донесат од Ферари. Јас ќе се обидам да имам добри трки и тоа е тоа. Понекогаш, како на минатата трка, ќе имаш лоша среќа. Кој знае? Не знам ништо повеќе од вас. Се работи за шпекулации кои ги слушам од почетокот на годината и ништо не ме изненадува“, вели Раиконен.
Во Австрија пред две недели Раиконен издржа само две кривини на патеката, откако претходно беше елиминиран во првата квалификациска сесија. Тој се удри со Фернандо Алонсо и заврши во ѕидот, но вели дека сè уште му се допаѓа новиот болид.
„Не знам зошто одеднаш не би го сакал овој болид. Поради еден инцидент? Болидот е добар, можеби не доволно брз да се предизвика Мерцедес, но многу подобар од минатогодишниот“, додава Финецот.