Возачот од Франција, Жил Бјанки беше погребан пред два дена, а трката за ГН на Унгарија, која викендов ќе биде на патеката „Хунгароринг“, ќе стартува со едноминутно молчење во негова чест. Тоа ќе се случи во 13:45 часот, по што ќе биде даден знак за почеток на финалните подготовки пред трката.
Сите се изјаснуваат со пофални зборови за Бјанки, а еден од оние кои зборуваа беше и шампионот и актуелен лидер Луис Хамилтон.
„Беше навистина тешко за сите нас што моравме да се збогуваме со Бјанки. Посакувам да го познавав подобро. Тоа што го знам за него е дека имаше силен дух и голема иднина. Сега спортот тргнува по еден сосема потежок пат. Повторно ни беше напоменато дека Формула 1 крие ризици кои ние како пилоти треба да ги почитуваме кога влегуваме во болидот. Напредокот на сигурноста на болидите досега е огромен и знам дека ФИА ќе продолжи да се движи во таа насока за да ја подобриме безбедноста уште повеќе“, вели Хамилтон.
Во секој случај несреќата која Бјанки ја доживеа пред девет месеци беше голема опомена за сите, а неговата смрт дефинитивно беше голем удар за Формула 1 и дефинитивно лекција за сите возачи.