Белгиското ГП беше „засрамувачко“ за Џенсон Батон, откако неговиот тим Мекларен повторно не покажа апсолутно ништо поради слабите мотори на Хонда. Од 19. место на стартот по серијата казни Батон заврши како 14. со еден круг заостанување. Зад возачите на Мекларен беа само тие на Мејнор-Марусја.
„Имавме проблем со ЕРС системот и не знам што точно беше. Како да возевме само на гориво без било која електроника. Ова не е проблем кој го имавме досега. Тежок ден, навистина засрамувачки да се вози на дното“, вели Батон.
Во текот на летната пауза, Хонда направи ревизија на моторот и потроши три ткн. „токени“, така што шефот на Хонда моторспорт, Јасухиса Араи најави дека ќе имаат иста моќ како Ферари.
„Морам да им се заблагодарам на Фернандо и Џенсон за нивниот професионализам во текот на викендот. Навистина е разочарувачки што не успеавме да ги исполниме нивните очекувања, а ниту очекувањата на фановите кои чекаа резултати“, изјави Араи по трката.
Батон вели дека би сакал да има малку повеќе брзина во однос на постојаноста.
„Повеќе би сакал да имам малку повеќе моќ. Добро е да си постојан, меѓута перформансите потешко се наоѓаат“, вели Батон.