Првиот 17-годишник кој се тркал во Формула 1 во средата стана првиот 18-годишник во спортот откако дебитантот на Торо Росо, Макс Ферстапен наполни 18 години.
„За мене тоа е добро. Кога имаш 18 години мислам дека луѓето го гледаат тоа како голем чекор. Тогаш кога ќе ја добиеш возачката дозвола, ќе пресетанат да за зборуваат за тоа“, изјави Холанѓанецот по освојувањето поени во Јапонија минатиот викенд со деветтото место.
Ферстапен до средата беше единствениот возач во Ф1 кој нема редовна возачка дозвола. Холанѓанецот оваа година стана најмладиот Ф1 возач во историјата кога во март во Австралија стартуваше со 17 години и 166 дена и не можеше да вози самостојно во Белгија каде што живее.
„Одлично е да се има 18 години и да се има возачка дозвола. Тоа што конечно можам да бидам на патот сам ми дозволува поголема независност. Бев малку нервозен да не на правам грешки, но сè помина како што треба“, вели Ферстапен.
РЕКОРДИТЕ ГО ЧЕКААТ ТИНЕЈЏЕРОТ
На патекат, синот на поранешниот Ф1 возач Јос успеа да ги „суреди“ критичарите и без дозвола. Тие кои велеа дека е премлад и побараа заострување на критериумот за добивање на супер-лиценца за настап во Ф1, што им успеа и што значи дека отсега нема да има помлади возачи од Ферстапен, мораа да признаат дека тој е вистински феномен.
Ниту еден тинејџер досега нема водено трка или поставено најбрз круг, и ниту еден возач под 21 години нема стартувано на пол-позицијата, кој стоел на подиумот (иако Ферстапен беше блиску со четвртото место во Унгарија), ниту победил. Најмладиот светски шампион беше Себастијан Фетел на 23 години.
КРИЗАТА ВО РЕД БУЛ НЕ ГО ЗАГРИЖУВА
Ред Бул и нивниот сестрински тим Торо Росо сè уште немаат обезбедено договор за мотори за следната година, со Ферари како единствен избор, и последните недели се шпекулира дека сопственикот на компанијата, Дитрих Матешиц, е подготвен да се повлече од спортот, но тоа не го вознемирува Ферстапен.
„Мислам дека не е потребно да бидам загрижен. Не знам што ќе се случи и за што се дискутира, но чувствувам дека Ред Бул и Торо Росо ќе бидат на стартот следната година“, изјави Ферстапен.
Италијанските медиуми веќе го поврзува со Ферари, кои, најверојатно, ќе имаат слободно место во 2017 по крајот на договорот на Кими Раиконен. Таткото Ферстапен исто така не гледа причини за паника.
„Макс направи доволно импресии во последните месеци, така што сум сигурен дека сè ќе се реди. Ќе биде одлично да ја продолжи кариерата со Ред Бул“, вели Јос.