Возачот на Мерцедес Нико Розберг вели дека не ги прифаќа забелешките на неговиот тимски колега Луис Хамилтон и дека ужива да го вознемирува светскиот првак. Иако ја загуби и втората сезона од Британецот, Розберг покажува добра форма за која не надева дека ќе ја пренесе и во 2016 година.
„Правилата не се менуваат и идната година, а тоа е добро за мене“, изјави Розберг, кој не се согласува со изјавата на Хамилтон дека имал брзина за победа на трката во Бразил.
„Претеруваше со своите гуми. Бев побрз, а тој со дивото возење ги потроши гумите и мораше трипати да застанува во боксот. Секогаш го имав под контрола“, додаде германскиот возач.
Розберг исто така мисли дека постојаните забелешки на Луис кон него значат дека трикратниот светски првак е вознемирен.
„Мислам дека не е среќен поради тоа што му ја расипав забавата по повод освојувањето на светската титула. Мислам дека некои негови изјави и аргументи во моментот доаѓаат во афект“, рече Розберг.