Шефот на Ред Бул Рејсинг, Кристијан Хорнер, тврди дека тој ги охрабрувал Мерцедес да потпишат договор со трикратниот Ф1 шампион Луис Хамилтон, кога тој излезе „на пазарот“ во 2012 година.
Во интервју за британскиот магазин „Ф1 Рејсинг“, Хорнер вели дека Хамилтон, кој доминираше со Мерцедес последните две години, бил повеќе заинтересиран да дојде во Ред Бул, каде што во тој период доминираше Себастијан Фетел.
„Тој беше очаен да вози за нашиот тим. Но, немаше начин на кој ние би можеле да го земеме додека Себастијан беше со нас“, вели Хорнер.
Британецот додава дека ги охрабрувал Мерцедес да потпишат договор со него како замена за седумкратниот Ф1 шампион Михаел Шумахер, кој се повлекуваше од спортот.
„Мекларен беа многу конкурентни во 2011 и 2012 година, и мислев дека ќе биде подобро за нас Луис да биде во Мерцедес отколку во Мекларен. Затоа кога зборував со Ники Лауда му посочив да го земе за да ги ослабиме Мекларен, без да сметам на тоа дека Мерцедес ќе станат толку моќен тим каков што го знаеме денеска“, додава Хорнер.