Шефовите на патеката Монца сè уште преговараат со носителот на комерцијалните права во Ф1, Берни Еклстоун за продолжување на договорот за организација на Италијанското ГП, тврдат италијанските медиуми.
Договорот на Монца со Формула 1 Менаџмент (ФОМ) трае до 2016 година и славната патека остана без јасен правец за иднината додека не се договори нов закон за да се зголеми финансиската поддршка за трката. Анџело Стики Дамјани, претседателот на Италијанскиот автомобилски клуб (АЦИ), неодамна најави дека потпишувањето на нов седумгодишен договор со Еклстоун е формалност.
Меѓутоа, италијанскиот магазин „Аутоспринт“ тврди дека Еклстоун бара 28 милиони $ годишно за трката (слично на сумата која ја плаќа Австрија), додека организаторите нудат 20 милиони $.
„Еклстоун побара 28 милиони $, сума која е многу повисока од нашите очекувања, но и пониска од таа кои ја плаќаат другите патеки. Баку на пример ќе плати 150 милиони $ за три години во Ф1“, изјави Стики Дамјани.
Монца е на Ф1 календарот како домаќин на сите Италијански ГП трки (освен во 1980 година), од 1950 година.