Последните вести околу состојбата на седумкратниот Ф1 шампион Михаел Шумахер воопшто не се добри, вели неговиот поранешен шеф од Ферари, Лука ди Монтеѕемоло.
Германецот се уште се опоравува во својот дом во Швајцарија, далеку од очите на јавноста, откако падна на скијање во декември 2013 година и доби сериозни повреди на главата.
„Имам вести и за жал тие не се добри“, изјави Монтеѕемоло за Ројтерс без да даде детали.
„Животот е чуден. Тој беше фантастичен возач и имаше само една незгода со Ферари во 1999 година“, додаде Италијанецот.
Неодамна, германскиот магазин „Бунте“ тврдеше дека Шумахер повторно може да оди, но ова беше веднаш демантирано од страна на агентот на Шумахер, Сабине Кем, која побара да не се создаваат шпекулации за неговото здравје.