Кими Раиконен вели дека неговата иднина со тимот на Ферари останува неизвесна и покрај неговата желба да остане во тимот барем уште една година. Поранешниот светски шампион исто така не знаеше дали ќе остане во Скудерија и во поголемиот дел од 2015, кога се шпекулираше дека Валтери Ботас е подготвен за негова замена.
36-годишниот Финец вели дека добро се чувствува во Скудерија и дека сака да остане уште долго време, но дека одлуката ќе ја донесат во Маранело.
„Навистина не знам повеќе. Вие медиумите знаете секоја недела нешто ново за мене. Тоа на крајот не е моја одлука и иако би останал, Ферари како тим треба да го реши тоа. Што ќе се случи, ќе видиме“, вели Раиконен пред Канадското ГП во Монтреал.
Пред трката во Монтреал, Раиконен има повеќе поени од колегата Себастијан Фетел во првите шест трки откако двајцата имаа по три подиуми. Тој ќе добие подобрен турбо-уред на неговиот СФ16-Х болид, но вели дека не очекува „чуда“.
„Целосно ги искористуваме подобрувањата и ова е чекор напред. Се работи за нов дел и нормално дека ќе биде подобро, но не очекувам чуда“, додава Раиконен.