Возачот на Ферари, Кими Раиконен упати серија на критики кон помладиот колега Макс Верстапен од Ред Бул поради опасно возење на патеката за Големата награда на Унгарија во неделата. Двобојот за петтото место на поранешниот Ф1 шампион и младиот талент кого го гледаат како иден шампион беше еден од најпечатливите на Хунгароринг, а Кими во два случаи беше блиску да се судри со Макс.
„Еднаш тргна лево, па се премисли и отиде десно. Правев се за да избегнам контакт. Добро е што не се забив во него“, изјави Раиконен присетувајќи се на контактот поради кој ги оштети предните крилца.
„Така беше и вториот пат. Мислам дека не возеше коректно. Не сакам повеќе да ги слушам неговите приказни дека правел како што треба“, вели искусниот Финец кој се чуди како Макс не е казнет.
„Не моја работа да критикувам, но сум видел возачи кои се казнети за многу помала работа“, вели Кими.