Кими Раиконен повторно го нападна својот Ф1 ривал Макс Ферстапен за агресивниот стил на младиот Холанѓанец, велејќи дека имале среќа што избегнале голема несреќа во Спа.
Возачот на Ред Бул беше цел на критики за агресивното бранење на Унгарското ГП, а ситуацијата се повтори и во Спа, каде што двојката беше во судир во средината на трката. Финецот својата фрустрација јасно ја покажа преку радио-комуникацијата, а не пропушти да го спомене и по трката.
„Јас сум секогаш за фер-битки и блиско тркање. Но, кога морам да сопирам по О Руж откако го правам потегот, не е в ред. Имавме среќа што немаше несреќа. Кога ќе морам да сопирам од полна брзина за да избегнам судир не е добро. Не сум го видел тоа кај другите возачи. Нешто не е в ред, но тоа не му е важно“, вели Раиконен.
„Неговата цел е да ме истурка од патеката“, изјави Кими преку радиото, но Ферстапен вели дека ова е „лага“.
„Тој требаше да го каже тоа на првата кривина кога двете Ферарија ме истуркаа. Мислам, можеби е добра телевизија кога некој се жали. Нема да им ја дадам мојата позиција толку лесно. Јас само се бранам, ако на некого не му се допаѓа тоа, тогаш тоа е нивни проблем“, вели Ферстапен.