Асот на Ред Бул, Макс Ферстапен, вели дека поддршката која ја доби од Луис Хамилтон за неговиот тркачки стил покажува дека трикратниот актуелен шампион „исто така е прав тркач“. Холанѓанецот беше на „жешка позиција“ по Белгиското ГП, во кое остро се бранеше од возачите на Ферари, Кими Раиконен и Себастијан Фетел, кои не беа задоволни од ситуацијата.
Ферстапен доби дури и „благо предупредување“ од директорот на трки на ФИА, Чарли Вајтинг, на последната трка во Италија, меѓутоа, Луис Хамилтон и Фернандо Алонсо застанаа во одбрана на 18-годишниот тркач, а Хамилтон додаде дека се работи за „исклучителен возач“.
„Тоа е добро да се слушне. Тоа исто така покажува дека тој е вистински тркач како мене“, вели Ферстапен
Од друга страна, тој немаше многу добри зборови за трикратниот Ф1 шампион Ники Лауда, кој му порача на Ферстапен да оди на психијатар за да ја намали агресивноста.
„Ако одам, тогаш можеме да одиме заедно со Лауда! Критиките не ме менуваат бидејќи на патеката го правам моето. Некои работи може да донесат критики, но треба да се навикнат на мене“, вели Ферстапен.