Џенсон Батон, човекот кој е во Формула 1 од 2000 година, ги оцени своите тимски колеги во кариерата велејќи дека актуелниот трикратен шампион Луис Хамилтон е најбрз, додека Фернандо Алонсо, сегашниот колега е најкомплетниот возач.
Батон во 2000 дебитираше покрај Ралф Шумахер во Вилијамс, и смета дека тој и колегата од 2003 Жак Вилнев се најтешките противници, но повеќе поради односот отколку квалитетите.
„За атмосферата најтешко беше со Ралф или со Жак. Бев млад и тие не сакаа млад возач кој би бил побрз од нив. Потешко беше со Жак, но сезоната беше одлична и забавна“, вели Батон.
Тој подоцна беше партнер со Хамилтон во 2010 и со Алонсо од минатата година.
„Во чиста брзина Луис е најдобриот. Тој можеше да извади неверојатна брзина на квалификациите и да ве остави да се чудите. Можевте да го видите неговиот талент од почеток. Но, во трките некогаш е непостојан. Можеби најбрзиот човек по Аиртон Сена. Но, Фернандо е најкомплетниот возач. Тој е екстремно интелегентен и знае како да го добие тоа што го сака од тимот. Во трките пак, секогаш е тука, без разлика дали е пред или зад тебе. Не можеш да се ослободиш од него“, вели Батон.