Откако победата му избега од раце на Малезиското ГП, Луис Хамилтон влезе во остар напад на својот тим Мерцедес, велејќи дека „некој или нешто не сака тој да стане шампион“, но откако го смири темпераментот, реши дека вината не е во тимот туку во околностите.
„Искрено, морате да ја сфатите и мојата гледна точка. Од една страна го имавме неверојатниот успех последните две години за што сум благодарен на Мерцедес. Момците работат напорно и сите не боли сега. Но, кога ќе излезете од болид со кој сте воделе и кој откажал, тешко е да се кажат позитивни работи“, вели Хамилтон.
Тој сега вината ја префрли на неговата среќа.
„Некој не сака да победам. Повисока сила. Се чувствувам како Бог или некој интервенира тука. Чувствувам дека сум бил благословен со многу шанси, прво со овој тим во последните две години. Морам да бидам благодарен на тоа“, додава Хамилтон.
Проблемите со постојаноста го следеа Хамилтон и на стартот на сезоната, кога губеше со 43 поени од Розберг по првите пет трки, но успеа да се врати во борбата за титулата пред летната пауза, кога имаше 19 поени предност. Меѓутоа, со загубените поени во Малезија тој има 23 поени заостанување на пет трки пред крајот, почнувајќи со Јапонското ГП во недела.
„Ова не е мојата најниска точка. Имав и полоши денови во Ф1. Во однос на тоа колку можеш да направиш, да, сега сум беспомошен. Но, ќе се обидам да најдам сила однатре за следните трки надевајќи се дека можам да имам добар викенд. Во првиот дел од сезоната имав чувство дека работите ми бегаат од рацете, но потоа дојдоа добрите резултати. Не знам што ќе се случи во следните пет трки, но можам да продолжам вака и да имам верба во тимот“, објаснува Англичанецот.