Новиот светски шампион во Формула 1, Нико Розберг не се предомисли за откажувањето од спортот ниту еден месец по освојувањето на трофејот. Германскиот возач вели дека веќе работи на идните планови во кариерата, додавајќи во интервју за „Франкфуртер алемајне цајтунг“ дека неговата одлука е исправна.
„Мојата мисија е исполнета. Си заминувам на врвот на моите способности и сега ќе работам на други проекти. Не знам каде, можеби во светот на бизнисот. Имам доста идеи, иако ништо не е одлучено засега“, вели Розберг.
31-годишниот Германец потврди дека едно нешто е сигурно, дека ќе поминува повеќе време со својата сопруга и со ќеркичката.
Запрашан дали повторно ќе биде близок со Хамилтон, кој му беше лут ривал последните три години, но претходно му беше најдобар пријател додека двајцата се натпреваруваа во картинг-сериите, Розберг вели дека е можно „загревање“ на односите.
„Можеби ќе бидеме блиски повторно и ако тоа се случи, тогаш ќе бидам среќен. Зборував со него за мојата одлука да се повлечам и тоа беше многу кул“, вели Розберг.